لَکَه تاری نَقل

ای مِردی ای شَو ایلَه پیرَه ژِنی قانَق بَه. اَ پیرَه ژِنی اَ شَوی بَیی لَکَه تار دواَ. مِردَکَه لَکَه تاری کا خَش آمَه. سَخسَری سب شِه را پیرَه ژِنی کا دَپَرسستَه کی اَیی کی شَنار بَه من دواَ و من هَردَه چیچی بَه؟ پیرَه ژِنَکَه واتَه چَیی نوم « لَکَه تار » بَه. مِردَکَه اَ پیرَه ژِنی کا خداحافیظی کَردَه و شَه. را کا ام خونَی کی « لَکَه تار»ی نومی ویر بَنکَرو دَمَندَه بَشتَنَه چَیی نومی تیکرار کَردِه. اَ هنتَه دَمَندَه واتِه « لَکَه تار ، لَکَه تار» تا بشو کَه اشتَن ژِنی باجو کی چَیی را « لَکَه تار » بیپِجو.

مِردَکَه شَه و شَه تا دَرَستَه ایلَه تولَه بَرَ. دَمندَه فکر کَردِه کی چتَه اواَ کا بَرشو. فکر آکَردِه فکر آکَردِه نی کابَه واتِه « لَکَه تار» هم هَیز و وَضی کا ای دَفه لَکَه تاری نوم چَیی ویر بَرشَه. انتَش زونوستَه چَیی نوم بَرگنستَه تولی دِلَه.

شوروش کَردَه دَمَندَه تولی دِلَه گَردستِه کی اَیی پَیدا بکَرو. چَنَه گَردستَه، نبَه. هَه مینَه کا ای نَفَری اَ ویندَه. تَجیبی نَه بَه کا دَپَرسستَه: چیچی راش کا گَردستِه؟واتشَه ای چییی می ژون آکَردَه کام چیی را گَردستِه. واتشَه ت ام تول آکَردَه «لََکه تار» اواَ کی نییَب هیچّی پَیدا کَردِه.

تا امی واتَه « لَکَه تار » مِردَکَه خوروستَه. واتشَه: هَ ! ویندمَه. اَز کابیم  لَکَه تاری دوملَه گَردستِه.